Griaß God beinand,
olle de doa,
de ojwei scho
und de neija de se draun
de Männa und de Fraun,
es is’ a’ Freid’,
endlich … es geaht wieda weida heit…!
Habt’s scho gwart
auf’n Start …?
schee…
mia doan wieda vor eng steh…!
Ja, wos soi i’ song….?
mia hots ja direkt d’Sprach voschloang,
so lang is’ her!
Ja…, lang lang ist her!
Sag mir das Wort Seniorennamedog
ja.. wenn war denn doa da Letzte grod….?
Des is’ schwer
lang, lang is’ her!
Es war
am 28. Januar
2020 mit’n Karbama Kone,
organisiert z’samm mit da PatraViktoria, war net ohne
der Film, von Taufkircha dasoim
er hot uns olle gfoin.
Intressant…
und mia warn beinand…
no ohne Wissn
dass ma so lang ausanandagrissn
iatz dann wern,
denn… Corona duat uns ois verwehrn.
a’ Zeit ganz ungewiss,
wos kimmt…? wos is’…?
Wos deaf ma, wos denn net?
Wo führt hi’ da Weg…?
Hoffentlich dawischt’s uns net,
des Virus, des ma no net kennt,
und… mia wead sich fremd
mit Abstand und da Maskn in seim Gsicht…
a’ ganz a unbekannte G’schicht.
Deaf i’, oda deaf i’ net
kimmt ma oana auf’n Weg,
„sog i’ ebbs…?“ –„ na i’ bin staad“
net dass i’ eahm ostecka no dat
oda er gent mi’
liaba schau i’ gor net hi’!
Kircha geh’
ja iatz weads schee
is nimma mehr erlaubt
aba d’Hauptsach is, mia glaubt….!
Denn mei liaba des gaang a’ no oa
dass da Herrgott nimma doa!
Akrata er, denn ma so braucht
iatza wos uns grod so schlaucht.
Livestream
is’ de Rettung gwen,
dass ma in da Heiligen Messe no
online gaud dabei sei ko,
mit de Pfaarra, de ma kennt…
aba ois is’ a’ weng fremd.
Uns oisam ist bekannt,
de Gschicht von de Spuren im Sand…:
„I’ glab, a’ in da Coronazeit, des konn ma song,
hot uns unsa Herrgott drong…,
drum oft oa Spur groad,
weil E r uns troang hod!“
Des konn ma ojwei wieda deitlich g’spian:
„Da Herrgott duat uns nia verliern!“
Und drum samma wieda beinand!
Samma gspannt,
s’duat weida geh’
des is’ schee,
offiziell iatz mit 3 G.
Mia wünsch ma iatz an scheena Nametog
ham grod a’ scheene Andacht g’hot
mit unserm Pater Dominik in gewohnter Manier,
und song ma Vergoits Gott a’ dafia.
Mia wünsch’ ma an griabign Schmatz
an entspannenden Ratsch
noch so langa Zeit wia des iatz war
Oana-dreiviertl Jahr………………..,
doa wead s’Schmatzn gwiss net gar!
Freile denk ma olle ganz fest dro,
an de, de heit nimma bei uns doa
und iatz ihr Hoamat anderswo,
doa wo sie iatz bleim dürfn all’zeit
drentn in da Ewigkeit!
Uns bleibt freile de Erinnerung grod,
an eahna Doasei, an de Tog
des uns und eahna Freid’ gmacht hot!
Denk ma an alle Verstorbenen aus unserm Seniorenkreis mit einem gemeinsamen Vaterunser.
Maria Galler